.png)
19.01.1935 y. – 20.03.2026 y.
O‘zbekiston Respublikasi Tog‘-kon sanoati va geologiya vazirligi huzuridagi “Mineral resurslar instituti” davlat muassasasi rahbariyati va xodimlari, shuningdek geologiya sohasi mutaxassislari chuqur qayg‘u bilan buyuk geolog, yuqori malakali mutaxassis, “Mineral resurslar instituti” DM bosh mutaxassisi Gleyzer Lev Mixaylovichning vafot etganini ma’lum qiladilar.
Lev Mixaylovichning butun hayoti O‘zbekiston geologiya xizmati bilan chambarchas bog‘liq edi. U M.V. Lomonosov nomidagi Moskva davlat universitetini tamomlab, 1958-yildan boshlab respublika mineral-xomashyo bazasini rivojlantirishga o‘zini bag‘ishladi va Chatqol geologiya-qidiruv ekspeditsiyasi geologidan tortib, geologiya-qidiruv ishlarining muhim yo‘nalishlarini boshqarishgacha bo‘lgan mehnat yo‘lini bosib o‘tdi.
Lev Mixaylovich Chatqol–Qurama mintaqasining mineral resurslarini o‘rganish va o‘zlashtirish ishlarining boshida turgan, X.M. Abdullayev nomidagi Geologiya va geofizika institutida ilmiy tadqiqotlar rivojiga katta hissa qo‘shgan hamda 1969-yilda hamkasblari bilan birgalikda strategik ahamiyatga ega bo‘lgan Shavazsoy litiy koni ochilishida ishtirok etgan.
U uzoq yillar davomida “Toshkentgeologiya” birlashmasi va “Sharqiy O‘zbekiston” DGPda samarali faoliyat yuritib, iste’dodli tashkilotchi va rahbar sifatida O‘zbekistonning sharqiy hududlarida geologiya-qidiruv ishlarini rejalashtirish va amalga oshirishda yuqori natijalarga erishdi.
Uning faoliyatidagi muhim bosqichlardan biri O‘zbekiston Respublikasi Davlat geologiya qo‘mitasi huzuridagi Foydali qazilmalar zaxiralari bo‘yicha Davlat komissiyasiga (DZK) rahbarlik qilgan davridir. Uning rahbarligida asosiy foydali qazilmalar bo‘yicha zaxiralarni hisoblashga oid yuzlab hisobotlar ekspertizadan o‘tkazilib, tasdiqlandi va bu mamlakat mineral-xomashyo bazasini shakllantirish hamda mustahkamlashga katta hissa qo‘shdi.
Lev Mixaylovich prognoz resurslarni baholash va geologiya-qidiruv ishlarini tartibga soluvchi normativ-metodik bazani ishlab chiqish sohasida yetakchi mutaxassislardan biri edi. Uning bevosita ishtirokida yer qa’rini o‘rganishga oid zamonaviy yondashuvlarni belgilovchi hujjatlar ishlab chiqilib, amaliyotga joriy etildi.
U Urtaliq, Amantoytov, Sarmich, Biran, Saribotir, Tomdibuloq, Qizilolma, Kauldi kabi yirik oltin konlarini o‘zlashtirish bo‘yicha texnik-iqtisodiy asoslarni ishlab chiqishda hammuallif sifatida ishtirok etib, mamlakat konchilik sanoati rivojiga salmoqli hissa qo‘shgan.
Lev Mixaylovich Gleyzer nafaqat yuqori malakali mutaxassis, balki yuksak madaniyatli, prinsipial, halol va o‘z ishiga sadoqatli inson edi. Uning chuqur bilimlari, yuksak mehnatsevarligi, samimiyligi hamda hamkasblarga hurmat bilan munosabati barchaning e’tirofiga sazovor bo‘lgan.
Lev Mixaylovich Gleyzerning vafoti O‘zbekiston geologiya sohasi uchun og‘ir va o‘rni to‘ldirib bo‘lmas yo‘qotishdir. Marhumning oila a’zolariga, yaqinlariga va hamkasblariga chuqur ta’ziya bildiramiz. Uning yorug‘ xotirasi qalblarimizda abadiy saqlanib qoladi.
